بعد أن تصدر قوائم بيلبورد عربية واحتل المراتب الأولى، تحدّث رامي صبري في مقابلة حصرية مع بيلبورد عربية حول بداياته في عالم الفن والمراحل التي مر بها. وفي حديثنا معه عن ألبومه الأخير "النهايات أخلاق" فقد دخلت أكثر من أغنية منه إلى القوائم، مثل "النهايات أخلاق" و "بين الحيطان" التي انتشرت بشكل كبير على مواقع التواصل الاجتماعي ومنصات الاستماع المختلفة. وكانت المفاجأة عند الحديث عن الألبوم حين كشف لنا للمرة الأولى عن قصة أغنية "بين الحيطان" وكيف أحيت عنده ذكرى أخيه الراحل حين سمعها وأدّاها للمرة الأولى.
- رامي صبري: "أغنية بين الحيطان تحديدًا أنا لما أخدتها هي فكرتي بأخويا اللي توفا من سنتين خدتها لأنها قريبة منه شوي. لما بسمعها بتلمسني أوي وبحسها وأول مرة غنيتها بكيت ما عرفتش أكمل التراك لقيت نفسي متأثر ودخلت فمود إني افتكرتو وكدا" يتابع: "لقيتها قصتها شبه اللي أنا فيه. ودي من الحاجات اللي مش كتير تحصلّي".
سألناه كذلك عن شخصيته الحقيقية خلف مواضيع أغانيه، خاصةً وأنه شخص سعيد في حياته بالرغم من أنه يغني أغاني الحب الحزينة:
- رامي صبري: بحب القصص اللي فيها مواضيع بتمس القلب. بحب أنا الموضوع ده. وأنا صوتي شوية في الحتة دي أهم وأعمق وأقوى بكتير من الحتت الصغيرة اللي هي الحاجات الصغيرة بمعني يعني الأغاني الخفيفة." ويتابع: " الأغاني الخفيفة حلوة لأنها بتنفعني على المسرح عشان الناس تبقى مبسوطة. وأنا بحبها أنا روحي كده برضو عندي الشخصية دي. إنما في الحزين بحس شخصيتي يعني شبهي.".
أما بالنسبة للميدليهات التي يقدّمها في حفلاته وعبر قنواته على يوتيوب ومنصات التواصل الاجتماعية وتحصد ملايين المشاهدات، فشرح:
- رامي صبري: "الفيدباك من الميدلي موضوع تاني خالص. ده جبلي جمهور تاني وبقا عندي فيوز تانية وبقا عندي كوميونيتي تانية من المنصات الديجيتال برضو لإن الناس بتحب اللايف وبتحب الميدلي وإني بدخلهم أغنية جديدة على أغنية قديمة فده بيذكرهم بذكريات زمان على ذكريات من النص على دلوقتي. فيعني عملي حالة تانية غير أغانيا اللي بتنزل."
أما عند سؤاله عن الجيل الجديد في المشهد الموسيقي المصري من جنرات مختلفة كالهيب هوب فاستمعنا إلى رأيه في أبرز نجوم الراب ونصيحتهم لهم في مسيرتهم:
- رامي صبري: " أنا بحب الشباب الجديدة اللي بتعمل أغاني الراب اللي هية طريقة مختلفة وجديدة حصلت مش نفس أغاني البوب بتاعتنا أو الأغاني الكلاسيكية اللي هية شبهنا. أغاني الراب اللي بقالها سنتين تلاتة زي ويجز زي عفروتو زي بابلو زي مروان موسى زي الجيل ده كلو عندنا فمصر. عملوا طريق جديد مختلف ونجحوا فيه جدًا عفكرة وعملوا فيوز رائعة وجماهيرية كبيرة جدًا." ويتابع: "أتمنى إن هما يستمروا ويكملوا عشان يبقوا موجودين. عشان هما مش هيفضوا موجودين إلا لما يطوروا الموضوع ده".
تابعوا اللقاء الكامل مع رامي صبري في الفيديو أعلاه.
